حلا القبعات

حلا القبعات

لهذا الحلا ذكري جميله في قلبي حيث قمت بصنعه كحلا ضيافه يوم دبش زوجة اخوي.. كلمة دبش كلمة قديمه ونعني بها اليوم إلا اهل العروسة يجلبو ملابس بنتهم لمنزلها المستقبلي .. بعد ان حطوا ملابس بنتهم في شقتها المستقبليه اتو إلي منزلنا وكان حلا القبعات احد انواع الحلا الذي قدمته في ذلك اليوم..


لا يعقدكم الاسم والشكل فهو بسيط للغايه ولا ياخذ وقت او جهد وبسبب الاوريو فطعمه لذيذ للغايه واليكم المقادير

المقادير

١٨ علبة بسكوت اوريو
علبة قشطة ( تم استخدام قشطة فلور)
حليب نستلة المركز
مجموعة من قطع المارس

ادوات التزيين

انا اشتريتها من محلات حنين بس اي محلات تبيع شرايط تلاقيها زي مهجة، الجستنيه، محلات يا بلاش وكدا..

شرائط فضية
وردات صغيرة
اي قالب صغير للتدوير

الطريقة

نجي للطريقه نبدا اول حاجة بالبسكوت 

نخلط نصف كمية البسكوت الاوريو في الخلاط حتي يتفتت

تضاف القشطة ونخلط تاني وبعدين نضيف الحليب المركز شوي شوي حتي تتكون لدينا عجينه نقدر نشكلها. ( طبعا لمن اقول عجينه مو زي عجينه المعجنات إلا اقصده انو تتجمع مع بعض وتقدري تمسكيها وتكوريها بعدين)

الحين تاخذي بسكوت اوريو وتفصلي الحبتين عن بعض وتزيلي القشة إلا بالنصف .

الحين نبدا ناخذ قطع صغيره من البسكوت الاوريو المطحون ونحط قطه من المارس بالنص ونكور الاوريو فيصير المارس كانو حشوة 

تحطي الكورة إلا عملتيها فوق حبة البسكوت وتضغطي عليها شوي عشان تلصق.

عشان تكون الاحجام متساويه جيبي قالب صغير زي غطا دوا عشان تضمني ان الكور تجي زي بعض او مغرفه ايس كريم صغيره.. 

الان خلصتي كل الكور وحطيتيها فوق البسكوت حطيه في الثلاجة شوي ليبرد ويتماسك علي بال تجهزي الشرايط والوردات او اي شي بتزيني فيه هنا كوني مبتكره حطي الالوان بحيث تكون مناسبه لعزيمتك..

لفي الشريطه حولين الكوره بحيث تكون الشريطة فوق بسكوت الاوريو واربطي الشريطة وقصي الزايد

خذي الوردات لانها تنتهي بحديده فتقدري تغرزيها داخل عجينه الاوريو فوق مكان الربطه عشان لا تبان عقده الشريطة

رصي البسكوت في اي صحن تقديم لديكي بشكل مناسب 

وضعيها بالثلاجة حتي تبرد وقدميها وبالعافيه.

وبالعافيه

تم ظبط المقادير وتجربتها حتي وصلنا إلي المقادير المظبوطة